Cwynodd Mrs A fod y Feddygfa wedi methu â darparu gofal a thriniaeth briodol mewn perthynas â swabiau a samplau wrin. Roedd ganddi bryderon hefyd ynghylch diogelwch y swab a ddefnyddiodd, a oedd wedi’i roi mewn toddiant siarcol, ac y gallai fod wedi’i ddefnyddio ar glaf blaenorol. Roedd Mrs A hefyd yn anfodlon â’r ffordd y deliodd y Feddygfa â’i chwynion a’i hymateb i’r gŵyn.
Canfu ymchwiliad yr Ombwdsmon fod cyfle wedi’i golli i atal Mrs A rhag defnyddio’r swab pan gysylltodd â’r Feddygfa i ddechrau i holi a oedd yn ddiogel. Achosodd y sefyllfa bryder sylweddol i Mrs A ac am y rheswm hwn, ac i’r graddau hyn yn unig, cadarnhawyd y rhan hon o gŵyn Mrs A.
Ni chanfu’r Ombwdsmon unrhyw dystiolaeth a fyddai’n awgrymu bod y swab siarcol wedi’i ddefnyddio neu y gallai fod wedi’i ddefnyddio cyn Mrs A, ac nid oedd unrhyw dystiolaeth bod y siarcol yn anniogel ac felly efallai wedi achosi niwed corfforol i Mrs A. Ni chadarnhawyd yr agwedd hon ar gŵyn Mrs A.
Canfu ymchwiliad yr Ombwdsmon ddiffygion gweinyddol a oedd yn gyfystyr â chamweinyddu ym mhroses trin cwynion y Feddygfa, yn enwedig o ran cadw cofnodion. O ganlyniad, nid oedd y broses ymchwilio mor gadarn ag y gallai fod wedi bod ac achosodd hyn anghyfiawnder i Mrs A. Cadarnhawyd y rhan hon o gŵyn Mrs A.
Cytunodd y Feddygfa ag argymhelliad yr Ombwdsmon y dylai adolygu ei thriniaeth o gŵyn Mrs A fel pwynt dysgu, a datblygu cynllun gweithredu i fynd i’r afael ag unrhyw fethiannau/methiannau ychwanegol a nodwyd, y dylid ei rannu â swyddfa’r Ombwdsmon.
