Roedd Mr A wedi cwyno am y ffordd yr oedd Nyth wedi tynnu ei gais yn ôl yn afresymol i osod boeler newydd yn ei eiddo o dan Gynllun Cartrefi Cynnes Nyth Llywodraeth Cymru. Roedd Nyth wedi hysbysu Mr A i ddechrau ei fod yn gymwys i gael boeler newydd o dan y Cynllun ar ddiwedd 2023. Fodd bynnag, tynnodd y cynnig yn ôl wedyn gan fod Mr A yn byw mewn Ardal Gadwraeth. Credai Nyth y byddai angen caniatâd cynllunio ar gyfer y gwaith ac na fyddai digon o amser iddo gael caniatâd cynllunio ac i wneud y gwaith cyn i’r Cynllun gau ddiwedd mis Mawrth 2024. Pan gwynodd Mr A am y mater hwn, cysylltwyd â’r Awdurdod Cynllunio Lleol a roddodd wybod yn brydlon nad oedd angen caniatâd cynllunio; gellid gwneud y gwaith dan reolau Datblygiad a Ganiateir.
Roedd yr Ombwdsmon o’r farn bod Nyth wedi methu â sefydlu’n gywir a oedd angen caniatâd cynllunio, mewn gwirionedd, cyn cau cais Mr A. Arweiniodd hynny at yr angen i Mr A brynu a thalu am osod boeler ei hun, a oedd yn anghyfiawnder.
Yn lle ymchwilio i’r gŵyn hon, cafodd yr Ombwdsmon gytundeb Nyth i ymddiheuro i Mr A o fewn 1 mis a’i ad-dalu am y gost o brynu a gosod boeler newydd. Cytunodd Nyth hefyd, o fewn 3 mis, i gynnal adolygiad i sicrhau nad oedd unrhyw ymgeiswyr eraill dan anfantais yn yr un modd.